أنا السودان انا التعبان أنا الغلبان أنا الضهبان
شرقي جرح وغربي ملح وفي جنوبي وحوش
وسطي صبح قمح نشفان ومات عطشان
وفي منبر الامات بدل حايمة
فنادق فارهة أدلي بيان
وأهلي هناك منو الشبعان
مرض حايم كلي ويريقان
تيلي دموع دوام بكيان
سمايا هموم دوام حزنان
هنا الخرطوم سلام كلتوم
حليمة هناك مجافية النوم
هنا أمدرمان سلام يا اخوان
ما شفتوا الجميع ضهبان؟
ما جاكم وليد عريان؟
لباسو انقد من القعدة والزححان؟
مادي الليد دوام فاضية
يصيح ويقول
أبوي مسجون وأمي كمان
وأخوي مرق افتش لقمة لي الجوعان
راح في الكشة لي الميدان
وعادم الخال مات العم ولا جيران
كرامة كرامة يا الماريين
أقول لله يا سمعان
مما اداكم الخلاق جودوا علي بالامكان
أقبل وين باب الرحمة كان مفتوح
ليه قافلنوا بي الاركان؟
يا ناس يا هوو أنا السودان
بلاد الجود وعرفين اهلها زمان
يكرموا الضيف ولي المحتاج خزن وأمان
آه وفوق الاه’ زيد كيمان
امكن اكون دخلت بلاد ناسها ما سودان
اكون ضهبان بكلم ناس بلد تانية مو السودان
أخونا هناك عليك الله
البلد دي شنو واسمها شنو؟ وجات من وين؟
ناسها اتغيروا مالن؟
بعد ما ولدت اوي قال لي
ابقي عشرة علي الاوطان
وفي الاوطان بس السودان
هم اهلي وكمان بلدي البحلف بيهو في الازمان
وبعد ما شفتو بي عيني وابوني أهلو
حلف ايمان أطوف الدنيا بي الاركان
بلد عراني جوعني وبقيت شحاد وما نفعان
اسبوا افوتو زي ما فاتي لي نسيان
وافتش لي بلد تانية
تكرم الضيف تغيث ملهوف بتدي جعان
خسارة حسافة يالسودان
انا القايقلك تكون ذخري وتكون سيفي وكت الحارة والضيمان
خضر عمر ابراهيم