لكم هذه القصيد للتغيير
ناس الجنوب اتلمو وناس الشرق اهتمو
وكل اللفي الغابات سابو السلاح انجموا
راكبين بروتوكولات تركو اللاوو وود عمو
سكن العموم عمارات ومن الفلس ما همو
رزم ربط دولارات انعل أبو البهتمو
والبركة في البترول لكل زول نص منو
برافو يا عم جون الله يكتر منو
احزابنا ما فاضين كلو داير حقو
والشعب ان عاجبو خلي البنقو ينقو
ومن مصر جايين كلو فاتح خشمو
همو فيلا والبنزين عرباتو ما بنعدو
ومنحة التحسين اصفارها ما بتلمو
وليك مدة ما بنت ود طه وين انت
انحنا ليك راجيين توقيعنا فوق الشنطة
وليك مدة ما بنت دينارنا وين انت
وانا في اشتياق للمسكة وين انت
وزحمة الحافلات امجادنا جنب الرقشة
وكية عاد لي الشرفاء وسكني الحتة
الماعاجبو عاد اتخارج ويفارق الحتة
وبركة في الاسياد والسلة فوق الفتة
والانتخاب مضمون بي ملحة او بي شطة
والباقي ما يتهمش مش فارقة بي البتة
والمهم راجعين واحزابنا كم دستة
عريسنا ود عرمان دستورنا سوطو ولمو
ما تنسي بند التوبة تعذيبنا الله يخمو
حقوقنا ضائة زمان يا اخوانا ما تهتمو
دستورنا باقي صفاح بين العريس بين عمو
اصلوا الطلاق مضمون ماهو المؤخر همو
وعملنا كم دستور فوق الرفوف انضموا
وبكرة ناس تانيين يقولو لينا انطموا
ومصيبة الدستور ناقص عشان ما نتموا
وليك مدة ما بنت يا تشريعنا وين انت
طوارينا ليك قاعدات ان عشت او كان مت
دستورنا وين انت وليك مدة ما بنت
وانا في اشتياق ليك انت ويييين انتاااااااا
انجمدت أفكاري وحيرتني انت
من الفلس مت يا جنيهنا وين فت
وانا في حيرة ما عارف لقيانا تكون امتي
ويييييين انتاااااا
خضر عمر