روعة بلادي
زولاً منِّك سافر
تاريهو كان بي عمرو خاطر
معاهو الحنين في الليل اتسامر
هزاهو الشوق دمعوا اتقاطر
********
روعة بلادي منبع اعتزازي
و لمة ناس بيها أتحدى زماني
ذكراك ديمة نار غرامي
يا نور الفرح البلوّن مداري
********
دار الجلال و النور
دار الجمَال و الحور
دار الرمال بلور
دار العبير منثور
********
يا ديار الخال و العم
ديار زولاً ما بيعرف الهم
عشقك ساكن جوه الدم
جيتك خلاص عشان انجم
********
فيك السنابل غطاها نضار
وشاح النسيمات الندية سوار
و العصافير شادية في الأشجار
سحر الطبيعة و العيون تحتار
********
دار بنيه سموها عفاف
حرف الغُنا من وصفها خاف
فيها جمال الدنيا طاف
و ما قادر أقول ليكم
الأوصاف
********
دار الجود و الأجداد
دار الزهد و العباد
دار الوجد و الوداد
دار السلاطين و الأمجاد
********
عشقوها ناساً شافوا الخلا
قالوا دارفور ما أجملا
زاروا الجبل شافوا الحلا
قالوا سبحان الخالق الكملا
********
يا ناس أنا فيها شبيت
و يومي المنها غبيت
في دنيا الضياع عانيت
و حنيت للدار المافي زيها
بيت
محمد موسى أبكر أبوكودة