تلاتة كباري وشارعين وسد

قصيدة للشاعر “محجوب شريف” : تلاتة كباري وشارعين وسد

تلاتة كباري وشارعين وسد…
قديتونا قصادهم قد…
لو جينا لكشف حساب وجرد…
أمسك واحد أول بدء:
سرقتو وطن واسع ممتد
 فكفكتوه . . .
وزعزعتوه…
وأرهقتوه…
وبشتنتوهو…
وهديتوهو هدا هد…
وهاك التاني أمراً أد :
حكمتو شعب كان زي الورد…
أفقرتوهو…
وشردتوهو…
وجهجهتوهو…
وعنصرتوهو…
وقطعتو حبل كان واصل ود…
أُخد التالت لو ترتد:
وجدتو مصانع لقيتو مزارع…
وسكة حديد جد بالجد…
عطلتوها…
وفرتقتوها…
ووقفتوها…
وشلعتوها…
وقطعتو رزق عمال من حد…
أحسب رابع وتابع العد:
وين تعليمنا ووين ترنيمنا؟
 وين آدابنا و وين كتابناــ ؟
 وين رياضتنا ووين ريادتنا؟
 مرمطوها…
وأخرتوها…
وأفشلتوها…
وطيشتوها…
وخلفتوها جهل عن قصد…
شوف الخامس أخذ ورد:
كيف وحدتنا وكيف دولتنا ؟
 كيف عيشتنا وكيف حالتنا؟
 ووين ثرواتنا؟
 ووين أموالنا؟
 وين غيرتنا؟
 وكيف سمعتنا؟
 خرمجتوها…
وبشتنتوها…
وبـددتوها…
ولوثتوها…
وبي سمعتنا مسحتو الأرض….
هاك السادس ونفسك سد:
 ((رئيساً راقص)) رقصاً شين…
مسئول ((مزواج)) ركاب سرجين…
وزارة تجارة وبياعين…
ناساً عايشة ومبسوطين…
جضوم منفوخة ملمعة زين…
كروش ممدودة متر مترين…
أيادي طرية نعومة ولين…
طالعين ماكلين نازلين بالعين…
مناشر تنشر مطحونين…
بفقه السترة محميين…
ومندسين ومدسوسين…
بفقه ضرورة وقوة عين…
نهابين ومغتصبين…
فساد شفناهو رأي العين…
وشميناهو أبو العفين…
وناس بهناك دايشين دايخين…
بطونهم خاوية وما لاقين…
وجوهم هايمة وفقرانين…
وعينهم طالعة وكمان صابرين…
وليه ساكتين؟؟
 ولي متين ساكتين؟؟
 بإسم الدين الخداعين…
خلو حياتنا زفت وطين…
تجار الدين الأفاكين…
ملعونين ملعونين…
ملعونين لي يوم الدين…
غشيتونا…
وبشتنتونا…
وعذبتونا…
وجننتونا…
وبكيتونا دمع ودم ولطخة خد…
وتقولي كمان!!!!!!!
تلاتة كباري وشارعين وسد!!!
بس يا ود…
حيلك شد…
ويد علي يد…
كلنا ضد…
ضد العسكر وحكم الفرد…

ضد الظلمة ومن أفسد…
نضال وارثنو أب عن جد…
أكتوبر أولى لنا بتشهد…
وأبريل التانية أعادت مجد…
والتالتة قريبة وما بتبعد…
خليك واثق واتأكد…
للأحلى حيكون الغد…
للأفضل راجنو الغد…
للأجمل حنبني الغد…
للأحلى حيكون الغد…
للأفضل راجنو الغد…
للأجمل حنبني الغد…

هذه المقالة كُتبت في التصنيف شعر. أضف الرابط الدائم إلى المفضلة.

التعليقات مغلقة.