شعب القرشي راجع

________
شعر: معز عمر بخيت
————–
يا عجوبة كفاك أرحل
سوبا خِربت وانت قاعد
ومافي زول
غيرك ح يفضل
بعد ما هدًمت دارنا
واستبحت وطن أمانَا
كل غابة وكل مشتل
جيت على الجامعة الفتية
وانت معروف زول أذية
زول حواري وبندقية
وجهل أجهل
جيت بليل مظلم وحالك
شايل الأسى و المهالك
والفساد بالسل تغلغل
في دمانا وفي رئاتنا
وفي تفاصيل كلْ حياتنا
وكل وادي وكل محفل
جامعة الخرطوم منارة
ونحن رافعين تاج شعارا
مهما تنوي ومهما تفعل
منبع الثورات ح تبقى
وانت في الدبابة أبقى
بين عنادك وبين زنادك
حلقة من أسخف مسلسل
نحن بالعلم ابتدينا
جامعة منهج شب بينا
والكفاح حاملنو مشعل
الجامعة في التاريخ أساسا
في العلوم مرفوعة راسا
وفي عناوين الحضارة
وفي محطات السياسة
باقية إقدام خير مؤصل
سطرت أمجاد بلادنا
وفجرت أحلام ولادنا
وكل فذ من صوبا أقبل
وانت خربت المرافي
والمساكن والمشافي
وكل آمال الغلابا
الكانوا أجمل
قبل ما تسرق ربيعم
وقبل ما تخنق رضيعم
وتستغل الدين وتجعل
أسوأ السوء في مسيرك
وكلْ مواطن حر أسيرك
والبلد في الذل بتوحل
بس تأكد وابقى عارف
جامعة قلعة وسيلا جارف
وانت أول حاجة ترحل
وانو شعب القرشي راجع
يهزم الليل والمدافع
وانت مدرك لما يزعل
ولما يستلهم طريقو
والنضال يصبح رفيقو
فجأة ح يصيبك في مقتل
جامعة الخرطوم حتبقى
والعساكر هي الحترحل
جامعة الخرطوم حتبقى
والعساكر هي الحترحل
_________________
معز عمر بخيت

هذه المقالة كُتبت في التصنيف خفايا وأسرار. أضف الرابط الدائم إلى المفضلة.

التعليقات مغلقة.