مواطنون يواجهون بكري حسن صالح بالمدينة وبكري يرد : لعلمك ما دارفور براها الحتنفصل!

أسعد علي

عقب ما نشرته يوم أمس عن وفد البشير .. توجه ظهر اليوم عدد من الأصدقاء الى المسجد النبوي الشريف بالمدينة المنورة وعقب الصلاة خرجوا عبر باب الملك فهد بن عبدالعزيز فوجدوا وزير شؤون الرئاسة ونائب الامين العام للحركة الاسلامية (بكري حسن صالح) في الشارع جوار مطعم كنتاكي مرتديا جلابية وعمامه مكرفسه ومعه أحد المرافقين السودانيين دون حراسة أو مرافقه من الجانب السعودي! توجهوا اليه مباشرة وقالوا له تقتلوا في الناس وبلا خجله جايين تزوروا النبي؟!! قايلين روحكم بتغشو ربنا؟؟!! دم الشهداء في رقبتكم يا مجرمين يا قتله..

وبدأ عدد من المارة السودانيين يتجمهرون حولهم فأمسك بكري بيد صديقي وزميل دراستي الاستاذ حسن خبير وقال له انت من وين في البلد؟! فرد حسن: ما ضروري من وين، المهم اني سوداني.. فقال له بكري: انت شكلك من الشمالية.. والله كان ما نحن حاكمين، البلد دي تخش في فوضى ويجوك في بيتك جوه ما تقدر تسوي حاجه! البلد دي زول بيقدر عليها غيرنا مافي..!

فقال له حسن انتو دمرتو البلد خربتم اقتصادها ومؤسساتها وشردتم شعبها وجوعتوه وأفقرتوه وقتلتوه وتسببتم في انفصال الجنوب وهسه دارفور لو استمريتم في الحكم ستنفصل.. فرد عليه بكل برود دارفور دي مصيرها تنفصل أي حاجة سويناها ليها وبرضو ما عاجبهم أديناهم وزارات ومناصب وقروش وبدون فائده.. الناس ديل عندهم أحقاد.! وبعدين لعلمك ما دارفور براها الحتنفصل! البلد دي حتتقسم لخمسة دول عديل!!! ده مخطط كبير موضوع وجاااهز ونحن عارفينو!

فقال له حسن طيب وقت عارفين في مخطط زي ده وانتو ما قادرين على البلد دي سيبو الحكم وأمشو..! فقال له: ناس الاحزاب ناديناهم الصادق والميرغني وقلنا ليهم تعالوا شيلو معانا الشيله ونعمل حكومة وحده لكنهم رفضوا..! فقال له حسن انتو العايزينو انو الاحزاب تجي تشارككم في جرائمكم! ثورة الشباب جاياكم جاياكم.. وحينها ماج الجمع وتعالت اصوات الانتقادات واللعن له وللبشير ونظامه وبدأ يتلعثم ويقطع ويتمتم ويهمهم فقام مرافقه باخراجه بسرعة من بينهم وهو يردد معليش يا اخوانا الراجل ده تعبان ومرهق وريقو ناشف وما قادر يقيف عشان يتناقش معاكم! فغادرا ومن خلفهما السودانيون يدعون عليه الله ينتقم منكم بحق كل قطرة دم سودانية سفكتموها..

هذه المقالة كُتبت في التصنيف أخبار. أضف الرابط الدائم إلى المفضلة.

التعليقات مغلقة.