استراحة سياسية

حاج سعد عضو في المجلس الوطني , وجاره بشير كافيه, جندي متقاعد , وعبد الله أبكر, جار  الجنب , وهو تاجر أواني المنزلية  في السوق الشعبي ومستأجر لدى حاج سعد  منذ فترة طويلة   ومؤذن متطوع لصلاة الفجر في مسجد الحارة  , أما حماد الأحيمر ,هو أحد أعيان الحي , وصاحب أقدم “كنتين” دكان في الحارة بجوار المسجد . اختفى عبد الله أبكر أو ” ود بكر” في ظروف غامضة, منذ أكثر من ستة أشهر لا أحد خبر بمكانه..!. يلتقي حاج سعد وجيرانه الثلاثة من وقت لآخر أمام دكان ” ود الأحيمر ” ويتجاذبون أطراف الحديث في السياسة وفي أحداث عامة أخرى كثيرة . في ذات أمسية التقت الجماعة بعد صلاة العشاء أمام الدكان كالعادة, فدار هذا الحوار فيما بينهم. 
حاج سعد : دايرين  واحد يأذن لنا صلاة الفجر , بدل ود أبكر ..ما عرفنا طفش وين..!  
ود الأحمير: بالمناسبة  ده عندي لكم خبر.. !, قالوا ود أبكر تمرد..! 
حاج سعد: معقول..! قلنا الزول اختفى مالو اتاري هو  تمرد…!  
بشير كافيه: لو قالوا ود أبكر تمرد هذا شيء مؤكد…! كان الوضع ما عاجبو وأنا حسيت بذلك  
حاج سعد : ديل والله ما فيهم خير ..من يوم استأجر مني البيت أنا ما ارتحت ليهو..خلي يغور في ستين داهية…!
ود الأحمير : بصراحة كان رجل طيب وأمين ..سدد كل الديون  العليو  قبل ما يسافر ,” جارورة ” الدكان الشهري وفواتير السكر وغيره ..   الله يهدينا ويهديه .
بشير كافيه: ما قلت ود أبكر دا  راجل  شيخ وود ناس..! مالك غيرت رأيك فيهو يا حاج سعد…!!  
حاج سعد : ديل الواحد فيهم يمثل ليك  حمل وديع ..  تقول القبة فيها فكي ..! ولكن في الحقيقة هو زى العقرب..بعد كده  الما عاجبو الوضع  فليتمرد ..!!المجاهدين جاهزين لحماية الدين  والوطن من العملاء والخونة والأنجاس  والطابور الخامس…!
ود الأحيمر : الناس  ما هم خونة ولا أنجاس ..! ولكن الفقر والجوع …و
حاج سعد : ما في جوع ولا عطش ..هذا مخطط إسرائيلي صهيوني لتفتيت البلاد وشرذمتها إلى دويلات قبلية وعرقية متقاتلة ..طيب حمل السلاح ضد الدولة  يحل مشكلة الفقر والجوع …!؟ 
بشير كافيه : يا جماعة خلونا من فزاعة  إسرائيل وشماعة أمريكا  ..! إمراض البلد وراثية, قبل ما تعادينا إسرائيل و نعرف  أمريكا غيرها…!!
ود الأحيمر : أنا بعرف ناس تمردوا  ما عندهم علاقة بإسرائيل ,هم اشد الناس عداوة وكراهية لليهود والنصارى.. ثم  إن  اليهود والنصارى ناقصهم مشاكل ..الإرهاب..قضايا تسلح النووي..معضلة سوريا ..التدهور الاقتصادي..  ما هم فاضين..!
حاج سعد: انتو ما عارفين اللعبة..! السودان الدولة العربية الوحيدة في جنوب الصحراء, يهدد مصالح إسرائيل في دول التي تقاسم الحدود مع السودان ” دول الجوار الأفريقي ” فلذلك المنظومة الغربية وأذنابها خائفة من بسط المشروع الحضاري الإسلامي السوداني على دول الجوار الأفريقي..!!
  بشير كافيه: ريح بالك يا حاج سعد..! بلا مشروع حضاري بلا خرابيط..! هل أنت  مقتنع  أو شايف مشروع حضاري هنا ..؟
ود الأحيمر : لكن يا حاج سعد  هسع البلد ما غرقان في مشاكل , الحرب في دارفور وفي جنوب كرد فان وجنوب النيل الأزرق ..!, الصراع الإثني والقبلي والجهوي المتصاعد مزق النسيج الاجتماعي للبلد..! , عم الفساد الإداري والأخلاقي بصورة فاضحة, وتفشت الأمراض الإيدز.., الذبابة الرملية…و, وظاهرة المخضرات وأطفال اللقطاء..! والعلاقة مع دولة الجنوب ومشكلة آبيي..!, والوضع الاقتصادي المتدهور , برضو تقول لي المشروع الحضاري ..!!    
حاج سعد: لا تنظروا فقط إلى الجزء الفارغ من الكوب..البلد بخير والتعليم والصحة بخير ..! الحكومة وفرت المدارس والجامعات العامة والخاصة في كل مدينة جامعة أو كلية, وتضاعف عدد الخريجين والخريجات, إنا شخصيا ً أبنائي الثلاثة تخرجوا من الجامعة ولدي بنتان في الجامعة الآن. 
بشير كافيه: أنا ولدي ترك الجامعة لما كثر علينا مصاريف الدراسة..! الآن جندي في جنوب كردفان .. طول  ما جانا منو خبر مش عارف حي ولا ميت ..!!
ود الأحيمر : رغم كثرة الجامعات ألا أن مخرجات التعليم سيئ جداً ..بصراحة  كثرت الجامعات والأخطاء اكتر ..!خريج ما يعرف إملاء ولا يقدر يكتب معروض أو “عريضة ” زى الناس…ده كلام..! 
حاج سعد : تدهور التعليم والاقتصاد ده حالة عامة ..! العالم كله يعاني من من تدهور الاقتصادي والحروب والصراعات زى ما انتو شافين ..! السودان مثله مثل أي دولة في الكرة الأرضية  يعاني كما يعاني الآخرون…! في حاجة ثانية ..لو عندك برنامج أو إستراتيجية  يفيد البلد لقدام , قدمو لنا نطبقه ..!
بشير كافيه: ما كل الدول العالم تعاني مثلنا كما تقول..المسألة نسبية , ولكن الفشل المتكرر واللامبالاة  بمستقبل الناس وعدم العدالة في الفرص المتاحة  غيرها..  !هو سبب التمرد  . بعدين في عالم السياسة ما في برنامج تقدم لك كسبيل لوجه الله  عشان تطبقه أنت..!, صاحب البرنامج هو الذي يقدم  ويطبق  إستراتيجياته  ويتحمل المسئولية , ما هو عمل خيري يقدموا ليك وتطبقه..!
 
حاج سعد : ود البلد الأصيل ما يتمرد ضد البلد ..!الأصلاء هم المرابطون على الثغور ..!الخونة والمرتزقة وأصحاب المآرب الشخصية هؤلاء هم المتمردون..!
ود الأحيمر : أتذكر مرة قلت لي  انك قد حملت السلاح ضد حكومة جعفر نميري ..! وأنت في مقتبل العمر يومذاك..! مالك ما ود بلد أصيل ولا شنو..!؟  
حاج سعد : نحن أولاد البلد ..! ولكن غرر بنا ..! جعفر نميري  ود بلد وأصيل زى رئيس البشير تماماً..! الخروج عليهما جريمة  ..! وأنا أعتذر للشعب السوداني لما بدر منا آنذاك…!!
بشير كافيه : من هم أولاد البلد الأصلاء ..!؟ أنا اعتقد كلنا أبناء هذا البلد العزيز..!وكلنا عزاز.. وكرام.. واصلاء  ..! ما في زول أحسن من زول …! الناس كلهم سواء, الادعاء مثل:  أنا أصيل ود بلد.. وأنا شريف ود عرب..وديل خونة ..وديل مرتزقة ..! مثل هذه أوصاف وأمثالها يفتح أبواب الجحيم للجميع ولا من مصلحة البلد..! 
حاج سعد : النار ما ولعت .. ! والسيوف لمعت … ! الصدرموشى بالدمي.. فارس الحديد ان حمي..!كوراك ضرب ..والدود قرقر..! والصقير حايم ..!! وأنت لسع تقول يفتح أبواب الجحيم..!أقول ليك حاجة يا ود كافية..! بعد كدا البيخرج علينا مشمر, نطلع له عريان ..! ما حرسو الجري وصدرك موشح بالدمى ما بخاف , فارس الحديد أن حمي…!!!

ود الأحيمر : الحرب ما هي زينة ..! ولكن الناس ما بيعقلوا..منذ ستين سنة نحن نحارب بعضنا..من سنة 1955م  حتى اليوم الحرب شغالة .. والله السودان بلد حظه زى الزفت..!!  
حاج سعد : بالله عليكم  ود أبكر  دا ناقصو شنو عشان يتمرد ..!؟ أهو مآكل وشارب زى الحلاوة..! ودكان في السوق داير شنو اكتر من كدا ” مداخلة من” بشير كافيه ” ليس بالخبز وحده يحيا الإنسان ” ما تتفلسف يا  ود كافيه ..أمشي أنت عيش بدون خبز ..!
بشير كافيه:أنا ماشي أنام يا جماعة…مع السلامة .. بكرة عندي مشوار للمعاشات.. 
ودالأحيمر : أنا ذاتي بقفل بعد كدا الساعة 11جات.

حامد جربو /السعودية
hamidjarbo@yahoo.com

هذه المقالة كُتبت في التصنيف أقلام حرة. أضف الرابط الدائم إلى المفضلة.

التعليقات مغلقة.