موكب 15 مارس وكنس الكوارث

بسم الله الرحمن الرحيم
موكب 15 مارس وكنس الكوارث
     البلد أعياها ظلم الابالسة وقهر الابالسة وسرقة الابالسة ، البلد اتسرقت وإتنهبت وإنشطرت والتنازلات مستمرة .. سلطة الكوارث إمتلكت كل حاجة، إمتلكت زمام أمر البيوت بعذاب قفة الملاح ، ونخوة الرجال بقانون النظام العام الذى عظم الصغائر وأذل الحراير، الابالسة إمتلكوا مكاتب الدولة بالخديعة والتطفيش ، سرقونا باسم الدين وأذلونا واهانونا باسمه أيضا ، وضيعهم أكمل الرباع من النساء ، وسفيههم شيد القلاع وفرش المتاع ، البلد نهبوها بشركات وهمية وعمولات مليارية ، كوبرى قيمتو سبعة وعمولتو 17 ، شارع قيمو أربعة وفاتورتو 40 ، شركاتهم شغلها حصرى فى شفط البلد عشان هى التفكير والتخطيط ودراسة الجدوى والتنفيذ ، دكاترة سلب ونهب سخروا العلم لظلم العباد وترويع العباد ، هؤلاء قوم اذا صادقتهم ندمت واذا هادنتهم خسرت ،ديل بكتلوا الكتيل وعاوزين ديتو  كمان ، مفاصل الاقتصاد إمتلكوها بسرقة ثروة العباد ، إبتدعوا توريث الوزارة فصار لاحمد عبد الرحمن بنت وزيرة وعثمان خالد ولدوا زول كبير فى الخارجية وود الزبير ياور قدر الدنيا ، حطموا أى حاجة المستشفيات العندها علاج أصبحت بقروش كثيرة ومستشفيات الغبش تدفع وترجع تشوف قرض ، جامعات البلاد أصابها هرم العقول والدور … جامعات حيشان وسط الحلة ومراكز البطش تزينت بشعار الشرطة ليست فى خدمة الشعب لانو الحراسة بقت شيك أكتر من عنبر المستشفى وقاعات العلم ، برندات السوق العربى بقت منتديات بطالة والبرندات لمت كل الشعب واولهم الخريجين والمشردين من الوظيفة وبقية أفراد الشعب الجاكي وراء قدح النبى ، قلة ما عندها شئ غير الكذب إستولت على البلد وأذلت شعب البلد ..
     دا حال البلد يا الريس ود البشير ، علاج الترقيع ما عندو فايدة وشغل العلاج بمقاس توازن القوى داخل الحزب الشعب جربها وخبرها ، تلمس مشاكل البلد من الصانعنها وإيجاد الحلول الغبشة مع الاحزاب الفتة ما عادت مربع أمل ، التطور فى القمع بيخلق تطور فى الصمود وأهى ليبيا فى الجزيرة ، وإجتماع رئيس البلد بشباب حزبو البتعدوا بالميات وفى قاعات وصوالين مكيفة أنحنا ما غاوزنو أنحنا عاوزين تسمعنا  يوم 15مارس ،شوارع البلد بتوصل ليك رسالتنا بدون تكسير وتخريب ،  الباقى لينا حنجرتنا دى بس وقوتنا بقت فيها …
   موكب كنس الكوارث يوم 15مارس  متقدمنو رجال القانون أصحاب الوجعة والاطباء والمهندسين والادباء والفنانين والمعاشيين والمشردين وناس برنداتنا الغبش ، وشبابنا الحى طلاب جامعاتنا وخريجينا هم أدوات الكنس التى تزيل القهر والجوع والذل والخنوع .. وبقول للشعب الانا واحد منو : يوم 15مارس يوم عزتنا وقلع حقنا بوحدتنا وبحناجرنا ..
               تنوية : راسلونا عبر البريد لتقوية شغلنا يوم15مارس

صديق ابوعمار
Msiddig10@yahoo.com

هذه المقالة كُتبت في التصنيف أخبار, أقلام حرة. أضف الرابط الدائم إلى المفضلة.

التعليقات مغلقة.